Jashari ka zgjedhur që reagimin e tij ta bëjë përmes rrjeteve sociale, pa dhënë një deklaratë të gjatë lidhur me aktgjykimin e shpallur në Hagë.

Në llogarinë e tij në Instagram, ai ka publikuar një fotografi të shoqëruar me një mesazh të shkurtër kushtuar Ushtrisë Çlirimtare të Kosovës.

“Rroftë Ushtria Çlirimtare e Kosovës”, shkruhet në fotografinë e publikuar nga Bekim Jashari.

Përmes këtij postimi, Jashari ka përcjellë qëndrimin e tij në një moment kur aktgjykimi i shpallur ndaj katër ish-krerëve të UÇK-së ka nxitur reagime të shumta në Kosovë.

Gjatë ditës janë deklaruar përfaqësues të institucioneve, partive politike, familjarë dhe figura të ndryshme publike, ndërsa reagimet kanë qenë të ndryshme sa i përket vendimit të Dhomave të Specializuara.

Bekim Jashari nuk ka dhënë sqarime të tjera në postimin e tij dhe as nuk është ndalur te pjesët konkrete të aktgjykimit. Mesazhi i publikuar prej tij është përqendruar vetëm te UÇK-ja.

Aktgjykimi i shpallur më 16 shtator është i shkallës së parë, çka nënkupton se procesi juridik nuk ka përfunduar dhe palët kanë të drejtë ta kundërshtojnë vendimin përmes procedurës së ankimit.