Publikimet në profilet zyrtare të ish-presidentit të Kosovës, Hashim Thaçi, në Facebook dhe në rrjetin X janë rikthyer. Aaktiviteti në këto llogari është rifilluar nga ekipi medial i Thaçit.

Në një postim të publikuar sonte në faqen e Thaçit në Facebook, është rikujtuar një aktivitet i mbajtur më 3 nëntor 1992 në Institutin Albanologjik në Prishtinë, me rastin e trevjetorit të rënies së Afrim Zhitisë dhe Fahri Fazliut.

Postimi thekson se në atë aktivitet Thaçi, në atë kohë udhëheqës studentor, kishte folur për veprimtarinë dhe sakrificën e dy të rinjve, të vrarë më 2 nëntor 1989 në Prishtinë.

Në publikim është rikthyer edhe një fragment i një shkrimi të Thaçit nga viti 1992, në të cilin ai i përshkruante Zhitinë dhe Fazliun si frymëzim për rezistencën e rinisë së asaj kohe. Mesazhi përmbyllet me nderime për të dy.

Kujtimi historik është shoqëruar me një fotografi të vjetër të Thaçit duke folur para mikrofonit dhe me një material të shtypur të asaj periudhe.

Rikthimi i publikimeve nuk nënkupton se ish-presidenti po i administron personalisht llogaritë. Këto postime në llogaritë e Hashim Thaçit do të bëhen dhe administrohen nga ekipi medial i tij.

Në vitin 2023, faqja e Thaçit në Facebook ishte bërë lajm pasi ishte rikthyer pas një ndërhyrjeje të paautorizuar në llogari. Rikthimi i tanishëm i publikimeve është një zhvillim tjetër dhe nuk duhet ngatërruar me atë incident.

Hashim Thaçi dha dorëheqje nga posti i presidentit në nëntor 2020, pas konfirmimit të aktakuzës nga Dhomat e Specializuara të Kosovës në Hagë. Ai i ka kundërshtuar akuzat e ngritura ndaj tij.