Pas kësaj, Sylaj dyshohet se kishte marrë rrugën drejt zonave malore të Becit, duke tentuar t’u shmangej autoriteteve policore.

Pas lokalizimit të tij, në terren janë angazhuar njësi të shumta të Policisë së Kosovës, përfshirë edhe Njësinë Speciale FIT, e cila ka marrë pjesë në operacion.

Gjatë zhvillimit të aksionit, Sylaj raportohet se kishte komunikuar me familjarët dhe kishte shprehur gatishmërinë për t’u dorëzuar, por me disa kërkesa.

Ai kishte kërkuar që, përpara dorëzimit, t’i mundësohej një takim i shkurtër me familjen, si dhe që dorëzimi të bëhej në prani të pjesëtarëve të Njësisë Speciale FIT.

Familjarët e tij ishin nisur drejt zonës ku po zhvillohej operacioni, ndërsa policia vazhdonte veprimet për arrestimin e të dyshuarit.

Operacioni përfundoi me arrestimin e Sylajt, gjë që është konfirmuar edhe zyrtarisht nga Policia e Kosovës.

Në njoftimin e saj, Policia ka bërë të ditur se arrestimi është realizuar pas angazhimeve intensive operative dhe hetimore, si dhe falë bashkëpunimit me qytetarët.

Megjithatë, hollësitë lidhur me veturën e motrës, lëvizjet në zonën malore dhe kërkesat e të dyshuarit para arrestimit janë raportuar nga mediat dhe nuk janë konfirmuar veçmas nga autoritetet.

Albert Sylaj dyshohet për përfshirje në rastin e Arlinda Zekajt, 49-vjeçares që humbi jetën në Vitomiricë të Pejës.

Policia ka njoftuar se procedurat e mëtejshme do të zhvillohen në koordinim me organet kompetente të drejtësisë.

I dyshuari prezumohet i pafajshëm derisa përgjegjësia e tij të vërtetohet me vendim gjyqësor të formës së prerë.