Stenaldo ka qenë së fundmi i ftuar në podcastin “N’Vibe Verë”, ku ndër të tjera është pyetur edhe për marrëdhënien që ka sot me Luiz Ejllin.

Pyetja nuk ishte aspak e rastësishme, pasi gjatë qëndrimit të Luizit për disa ditë brenda shtëpisë së “Big Brother VIP 5”, mes dyshes u krijua një afërsi që tërhoqi vëmendjen e publikut.

Luizi dhe Stenaldo kaluan mjaft kohë duke biseduar, bërë humor dhe shkëmbyer këshilla, ndërsa fituesi i BBVA 2 u shfaq veçanërisht mbështetës ndaj tij. Në atë periudhë, Stenaldo deklaronte se hyrja e Luizit kishte ndikuar drejtpërdrejt në mënyrën se si ai po e përjetonte lojën dhe madje ishte shprehur se shkodrani ia kishte “ndryshuar” rrugëtimin në Big Brother.

Raporti dukej se do të vazhdonte edhe jashtë kamerave. Luizi madje i kishte premtuar Stenaldos se sapo të dilte nga shtëpia do të takohej me të dhe e mbajti fjalën. Vetëm pak pas eliminimit të Stenaldos, të dy u shfaqën së bashku, ndërsa nuk munguan as batutat mes tyre.

Vetë Stenaldo, në atë kohë, e përshkruante me fjalë shumë të forta marrëdhënien me këngëtarin.

“Luizin e kam dritë, më ndërroi rrugën time të BBV dhe e dua fort. Është një nga fitoret më të mëdha të miat të atij programi”, deklaronte ai pas daljes nga reality show.

Madje në fotografinë e publikuar pas takimit me të, Stenaldo e falënderonte publikisht Luizin për mbështetjen dhe shprehte respektin që kishte ndaj tij.

Por disa muaj më vonë, situata duket se ka ndryshuar.

I pyetur në “N’Vibe Verë” se çfarë raporti ka sot me Luiz Ejllin dhe nëse vazhdojnë të komunikojnë, Stenaldo dha një përgjigje të gjatë dhe mjaft diplomatike, duke shmangur një arsye konkrete se përse marrëdhënia nuk është më aq e afërt.

Ai la të kuptohej se Luizi i kishte hapur një derë dhe se e vlerësonte atë që kishte ndodhur mes tyre, por në të njëjtën kohë konfirmoi se prej kohësh nuk komunikojnë rregullisht.

Sipas Stenaldos, mes tyre nuk ka pasur ndonjë konflikt apo përplasje.

Ai e krahasoi situatën me atë që ndodh shpesh edhe mes miqsh të tjerë: njerëzit mund të kenë një marrëdhënie të mirë, por me kalimin e kohës të mos flasin më aq shpesh, për shkak të angazhimeve, rrethanave apo thjesht sepse rrugët nuk u kryqëzohen.

Pra, përgjigjja ishte e gjatë, por pa zbuluar një episod konkret që mund të kishte sjellë ftohjen.

Ajo që Stenaldo bëri të qartë ishte se nuk ka “asgjë” me Luizin dhe se mungesa e komunikimit nuk duhet interpretuar domosdoshmërisht si një sherr mes tyre.

Megjithatë, deklarata nuk kaloi pa ngritur pikëpyetje, pikërisht për shkak të afërsisë së madhe që dyshja kishte shfaqur vetëm pak muaj më parë.

Nga një raport ku Stenaldo e quante Luizin “dritë” dhe “një nga fitoret më të mëdha” të eksperiencës së tij në Big Brother, sot duket se dy ish-banorët kanë përfunduar në një marrëdhënie shumë më të distancuar.

Nëse pas kësaj distance ka ndodhur diçka konkrete, Stenaldo nuk zgjodhi ta tregojë.

Për momentin, versioni i tij mbetet i thjeshtë: nuk flasin prej kohësh, por nuk kanë asnjë problem me njëri-tjetrin.