“Ai vlerëson gjithë mbështetjen e popullit. Ai e di që lufta do të vazhdojë. Ai do të bëjë gjithçka që duhet për të luftuar për veten dhe popullin e Kosovës”, ka deklaruar Prosper.

Deklarata e avokatit vjen menjëherë pas aktgjykimit të shkallës së parë, ndërsa vëmendja tashmë është zhvendosur te hapat e ardhshëm juridikë që mund të ndërmarrë ekipi mbrojtës.

Sipas Prosper, Thaçi është i vetëdijshëm se procesi nuk përfundon me vendimin e sotëm dhe se beteja juridike do të vazhdojë.

Gjatë ditëve të fundit në Hagë janë mbledhur familjarë, ish-bashkëpunëtorë dhe qytetarë të shumtë shqiptarë, të cilët kanë shprehur mbështetjen e tyre për Thaçin dhe tre ish-krerët e tjerë të UÇK-së.

Pas shpalljes së vendimit, edhe familja Thaçi ka bërë të ditur se vazhdon të besojë në pafajësinë e ish-presidentit. Vëllai i tij, Gani Thaçi, deklaroi se familja tashmë pret procesin e Apelit.

Deklarata e Pierre Prosper është ndër reagimet e para nga ekipi mbrojtës pas takimit me Thaçin, ndërsa pritet që mbrojtja të analizojë aktgjykimin dhe të përcaktojë hapat që do të ndjekë në fazën e ankimit.

Aktgjykimi i shpallur është i shkallës së parë, prandaj procesi juridik nuk konsiderohet i përfunduar dhe vendimi mund të kundërshtohet në Apel.