Sipas një analize të publikuar në The Independent, nevoja për gjumë ndryshon nga një person te tjetri dhe tetë orët nuk përbëjnë një rregull universal.

Studiuesit kanë analizuar edhe mënyrën e jetesës së komuniteteve që jetojnë pa ndikimin e madh të teknologjisë dhe ndriçimit artificial.

Në disa komunitete në Tanzani, Namibi dhe Bolivi, njerëzit flinin mesatarisht nga 5.7 deri në 7.1 orë gjatë natës, pa pasur nevojë ta kompensonin këtë me gjumë të gjatë gjatë ditës.

Ndërkohë, një studim tjetër, i cili analizoi lidhjen mes gjumit dhe plakjes së organeve, vlerësoi se kohëzgjatja optimale mund të lëvizë nga 6.4 deri në 7.8 orë, varësisht nga individi dhe organi i analizuar.

Megjithatë, këto rezultate nuk dëshmojnë se gjumi më i shkurtër është i mjaftueshëm për të gjithë.

Ekspertët theksojnë se gjumi i pamjaftueshëm lidhet me rrezik më të lartë për sëmundje të zemrës, probleme me kujtesën, mbipeshë dhe çrregullime të tjera shëndetësore.

Nga ana tjetër, disa studime kanë gjetur lidhje edhe mes gjumit tepër të gjatë dhe problemeve shëndetësore. Por kjo nuk do të thotë domosdoshmërisht se gjumi i gjatë i shkakton këto probleme, pasi ndonjëherë ai mund të jetë pasojë e një sëmundjeje ekzistuese.

Rekomandimet aktuale për shumicën e të rriturve mbeten nga shtatë deri në nëntë orë gjumë në natë.

Sipas profesorëve Derk-Jan Dijk dhe Anne Skeldon, rëndësi nuk ka vetëm numri i orëve që flemë, por edhe cilësia e gjumit dhe rregullsia e orarit.

Ata shpjegojnë se drita artificiale, përdorimi i pajisjeve elektronike dhe ndryshimet e vazhdueshme të orarit mund të ndikojnë në ritmin biologjik të organizmit.

Prandaj, përfundimi i studiuesve është se nuk ekziston një numër i vetëm orësh gjumi që u përshtatet të gjithëve. Më e rëndësishmja është që secili të flejë mjaftueshëm për nevojat e organizmit të tij, duke ruajtur një orar sa më të rregullt.